news gujarati
પહેલગામમાં થયેલા નિર્દયી આતંકી હુમલાના પગલે, 35 વર્ષમાં પ્રથમ વખત કાશ્મીર ખીણમાં સંપૂર્ણ બંધનું એલાન કરવામાં આવ્યું છે. લોકો રસ્તાઓ પર ઉતરીને ઉગ્ર કાર્યવાહીની માગ સાથે શાંતિપૂર્ણ દેખાવો કરી રહ્યા છે. સમાજના તમામ વર્ગોએ આ હુમલાની કડક શબ્દોમાં નિંદા કરી છે.
સ્થાનિકોનો વિરોધ અને મસ્જિદોમાંથી નિંદાનું એલાન
દક્ષિણ કાશ્મીરથી લઈને ઉત્તર કાશ્મીરના નિયંત્રણ રેખાને અડીને આવેલા નૌગામ (કુપવાડા) સુધી, મંગળવારે સાંજે સ્થાનિક લોકોએ પહેલગામ આતંકી હુમલાની નિંદા કરતી કેન્ડલ માર્ચ કાઢી હતી. શ્રીનગરની મસ્જિદોમાં એલાન કરવામાં આવ્યું કે, “હુમલાખોરો ઈસ્લામ અને કાશ્મીરિયતના દુશ્મન છે.”
શ્રીનગરમાં બંધનું પાલન
શ્રીનગરમાં મોટાભાગની દુકાનો, ફ્યુઅલ સ્ટેશનો અને અન્ય વેપાર-ધંધા બંધ રહ્યા. માત્ર જરૂરી ચીજવસ્તુઓની દુકાનો જ ખુલ્લી રહી. જાહેર પરિવહન સેવા કેટલાક વિસ્તારોમાં ચાલુ હતી, જ્યારે કેટલીક જગ્યાએ બંધ રહી. ખાનગી વાહનોની અવરજવર ચાલુ હતી. ખાનગી શાળાઓ બંધ રહી, પરંતુ સરકારી શાળાઓ ચાલુ હતી.
ચુસ્ત સુરક્ષા વ્યવસ્થા
શ્રીનગર સહિત કાશ્મીરના તમામ પર્યટન સ્થળો અને સંવેદનશીલ વિસ્તારોમાં ચુસ્ત સુરક્ષા બંદોબસ્ત ગોઠવવામાં આવ્યો છે. સુરક્ષાકર્મીઓએ વિસ્તૃત સર્ચ ઓપરેશન હાથ ધર્યું છે, જેથી આગળના કોઈ સંભવિત હુમલાને નિષ્ફળ બનાવી શકાય.
મોતનો આંકડો વધ્યો, શોકનો માહોલ
આ હુમલામાં અત્યાર સુધીમાં લગભગ 28 લોકોના મોત થયા છે, અને મોતનો આંકડો સતત વધી રહ્યો છે. આ ઘટનાથી સમગ્ર ભારતમાં શોકનો માહોલ છવાયો છે. સ્થાનિકોએ દોષિતોને કડકમાં કડક સજા આપવાની માગ કરી છે. અનેક રાજકીય પક્ષો, સામાજિક-ધાર્મિક સંગઠનો, વેપારી મંડળો અને નાગરિકોએ કાશ્મીર બંધને સંપૂર્ણ સમર્થન આપ્યું છે.કાશ્મીર ચેમ્બર ઓફ કોમર્સ એન્ડ ઈન્ડસ્ટ્રીઝ, કાશ્મીર ટ્રેડર્સ એન્ડ મેન્યુફેક્ચરર્સ ફેડરેશને આ બંધને સમર્થન આપ્યું છે.
ગુજરાત તેમજ દેશ અને દુનિયા ની તાજી ખબરો મેળવો ફક્ત News Gujarati પર.
