રાજસ્થાનના રાજસમંદ જિલ્લામાં એક દુઃખદ ઘટના બની, જ્યાં અમદાવાદથી ભીલવાડા જતી ખાનગી બસ બેકાબૂ થઈને પલટી ખાઈ ગઈ. આ દુર્ઘટનામાં ત્રણ મુસાફરોના જીવ ગયા, જ્યારે 20થી વધુ લોકો ગંભીર રીતે ઘાયલ થયા. આમાંથી બે વ્યક્તિઓની હાલત અત્યંત નાજુક હોવાનું જાણવા મળ્યું છે. આ ઘટના કાંકરોલી નજીક આવેલા ભાવા બસ સ્ટેન્ડ પાસે બની હતી. પ્રાથમિક તપાસમાં જાણવા મળ્યું છે કે ડ્રાઈવરને ઝોકું આવવાને કારણે બસે સંતુલન ગુમાવ્યું અને આ અકસ્માત સર્જાયો.
સવારના સમયે બની ઘટના
આ દુર્ઘટના આજે સવારે 8:30 વાગ્યે બની હતી. અકસ્માત બાદ તાત્કાલિક બચાવ કાર્ય શરૂ કરવામાં આવ્યું. ઘાયલોને તાત્કાલિક નજીકની હોસ્પિટલમાં લઈ જવાયા, જેમાંથી બે ગંભીર રીતે ઘાયલ વ્યક્તિઓને વધુ સારવાર માટે ઉદયપુર ખસેડવામાં આવ્યા. અન્ય ઘાયલોની હોસ્પિટલમાં સારવાર ચાલુ છે. સ્થાનિક પોલીસ અને વહીવટી તંત્રે ઝડપથી બચાવ કામગીરી હાથ ધરી હતી.
મૃતકોની ઓળખ હજુ બાકી
આ ઘટનામાં મૃત્યુ પામેલા લોકોની ઓળખ હજુ સુધી થઈ શકી નથી. કેટલાક ઘાયલોની હાલત ગંભીર હોવાથી મૃત્યુઆંકમાં વધારો થવાની શક્યતા છે. પોલીસે ખાનગી બસ કંપની અને ડ્રાઈવર સામે બેદરકારીનો ગુનો નોંધીને તપાસ શરૂ કરી છે.
ગુજરાત તેમજ દેશ અને દુનિયા ની તાજી ખબરો મેળવો ફક્ત News Gujarati પર.