ટાઈમ મેગેઝિનની વિશ્વની 100 સૌથી પ્રભાવશાળી વ્યક્તિઓની યાદી 2025 માટે જાહેર થઈ છે, પરંતુ આ વખતે ભારતની કોઈ પણ હસ્તીને આ યાદીમાં સ્થાન મળ્યું નથી. આ યાદીમાં અમેરિકાના રાષ્ટ્રપતિ ડોનાલ્ડ ટ્રમ્પ, ઉદ્યોગપતિ એલોન મસ્ક અને બાંગ્લાદેશના નોબેલ વિજેતા તથા વચગાળાની સરકારના નેતા મોહમ્મદ યુનુસ જેવા નામો સામેલ છે. ભારતીયોની આ યાદીમાંથી ગેરહાજરી ચોંકાવનારી છે, કારણ કે અગાઉના વર્ષોમાં ઘણી વખત એક કે વધુ ભારતીયો આ યાદીમાં સ્થાન પામતા હતા.
આ વખતે યાદીમાં ચીનના રાષ્ટ્રપતિ શી જિનપિંગ, રશિયાના નેતા વ્લાદિમીર પુતિન કે ફ્રાન્સ અને જર્મની જેવા યુરોપીય દેશોના નેતાઓને પણ સ્થાન નથી મળ્યું. ટાઈમ મેગેઝિનની પસંદગીનો આધાર એવા નેતાઓ અને વ્યક્તિઓ પર રહે છે, જેમણે તાજેતરમાં વૈશ્વિક સ્તરે નોંધપાત્ર અસર કરી હોય અથવા સમાજમાં મોટું પરિવર્તન લાવ્યા હોય. આ કારણે જ ભારત, ચીન કે રશિયા જેવા દેશોના પ્રભાવશાળી નેતાઓ આ વખતે યાદીમાંથી બાકાત રહ્યા.
2024ની ટાઈમ 100 યાદીમાં ભારતની કુસ્તીબાજ સાક્ષી મલિકે કુસ્તી આંદોલનમાં તેમની ભૂમિકાને કારણે સ્થાન મેળવ્યું હતું, જ્યારે બોલિવૂડ સ્ટાર આલિયા ભટ્ટે તેમની ફિલ્મો અને સામાજિક પ્રભાવને લીધે યાદીમાં જગ્યા બનાવી હતી. આ વર્ષે મોહમ્મદ યુનુસને બાંગ્લાદેશમાં વિદ્યાર્થી આંદોલન બાદ સરકારનું નેતૃત્વ સંભાળવા અને દેશની રાજકીય પરિસ્થિતિમાં ફેરફાર લાવવા બદલ આ યાદીમાં સ્થાન મળ્યું છે.